ನವನವೀನ ಜೀವನ

ಇದು ಹೇಗಾಯಿತೆಂಬುದ ನಾನರಿಯೆ ...
ನಾನೆಣಿಸಿದ್ದೆ ಗತಕಾಲವ ನಾನೆಂದೂ ಮರೆಯೆ...
ಆದರೆ ನಿನ್ನ ಶುಚಿಭಾವ ನನ್ನ ಸೆಳೆಯೆ...
ಸೋತೆ ನಾ ನಿನ್ನ ಮನಸಾರೆ ಪಡೆಯೆ...

ಸೆಳೆದೆ ನೀ ನನ್ನ ಮನವ ಮೃದುಭಾವದಲೇ...
ಎಳೆದೆ ನನ್ನ ಚಿಂತನೆಗಳ ನಿನ್ನೆಡೆಗೇ ಭಲೇ...
ಧನ್ಯಳು ನಾ ನಿನ್ನ ಹೃದಯದಿ ಸ್ಥಾನ ಪಡೆಯಲೇ...
ಚಿಗುರಿವೆ ಹೊಸದಾಗಿ ಈ ಮನದಲಿ ಭಾವನೆಗಳ ಅಲೆ...

ನಿನ್ನ ಹೆಸರೇ ಗುನುಗುನಿಸುತಿದೆ ಎದೆಯ ಬಡಿತದಲಿ...
ನಿನ್ನ ಸ್ಮರಣೆಯೇ ಬರುತಲಿದೆ ಪ್ರತಿ ಉಸಿರಿನಲಿ...
ನನ್ನ ಅದೃಷ್ಟವೇ ಆರಾಧಿಸಲು ನಿನ್ನನು ಮನದಲಿ...
ಸ್ಥಾನವ ಕಸಿದಿರುವೆ ನೀ ನನ್ನ ಈ ಹೃದಯದಲಿ...

ಸೋತಿರುವೆ ನಾ ನಿನಗೆ ನನಗರಿವಿಲ್ಲದ ಹಾಗೆಯೇ...
ನಿನ್ನ ಶುಭ್ರಮನದಲಿ ಸ್ಥಾನ ಪಡೆಯಲರ್ಹಳೋ ನಾನರಿಯೆ...
ಜನುಮಜನುಮದಲೂ ನೀನಿರಬೇಕು ಬರಿ ನನಗಾಗಿಯೇ...
ಎಂದೆಂದಿಗೂ ನಾವಿಬ್ಬರಿರಬೇಕು ಜೊತೆ ಜೊತೆಯಲೇ...