ಸ್ನೇಹ- ನಿಜವಾದ ಗೆಳತಿ

ಸ್ನೇಹ ಎಂಬುದು ಎಲ್ಲರ ಬದುಕಿನಲ್ಲಿ "ಉಸಿರು" ಎಷ್ಟು ಮುಖ್ಯವೋ ಅಷ್ಟೇ ಮೌಲ್ಯವುಳ್ಳದ್ದು.. ಹಲವರ ಸ್ನೇಹ ಸಣ್ಣಪುಟ್ಟ ವಿಷಯಗಳಿಂದ ಬಿರುಕು ಮೂಡಿ ಮುರಿದು ಹೋಗುವುದು ಸಾಮಾನ್ಯ. ಆದರೆ ಅಂಥ ಬಿರುಕುಗಳನ್ನು ಸರಿಪಡಿಸಿ ಸ್ನೇಹವನ್ನು ಕಳೆದುಕೊಳ್ಳದೆ ಜೀವನ ಪರ್ಯಂತ ಮುಂದುವರೆಸಿಕೊಂಡು ಹೋಗುವುದೇ ನಿಜವಾದ ಪ್ರೀತಿ. ಅಂಥ ಒಂದು ನಿಜವಾದ ಗೆಳೆತನದ ಅನುಭವ ನನಗೆ ಸಿಕ್ಕಿದ್ದು ನನ್ನ ಪದವಿ ತರಗತಿಗಳಲ್ಲಿ ನನ್ನ ಜೊತೆಗಿದ್ದ ಒಬ್ಬ ಗೆಳತಿ.. ನಿಜವಾಗಿಯೂ ಜೀವನ ಪರ್ಯಂತ ಅವಳನ್ನು ನೆನೆಯುತ್ತಲೇ ಇರುವುದು ನನ್ನೀ ಮನ.. ಅವಳಿಗಾಗಿ ಈ ಕೆಳಗಿನ ಸಾಲುಗಳು...

ನಿಜವಾದ ಗೆಳತಿ

ಕದಡಿ ಹೋಗಿದ್ದ ಈ ನನ್ನ ಜೀವಕೆ
ಬೆಳಕಾದೆ ನೀ ನನ್ನ ಗೆಳತಿಯೇ..
ಸಂತಸ ನೀಡಿದೆ ನೀ ನನ್ನ ಮನಕೆ
ಓ ನನ್ನ ಪ್ರೀತಿಯ ಸಂಗಾತಿಯೇ.

ಬೇಸರವು ಕವಿದಿದ್ದ ಬಾಳ ಆಗಸದಿ
ತಂದೆ ನೀ ಉಲ್ಲಾಸದ ಭಾಸ್ಕರನ.
ನಿನಗೆಂದಿಗೂ ಚಿರಋಣಿ  ನಾ ಈ ಜೀವನದಿ
ಸೃಜಿಸಿದಕೆ ನನ್ನ ಸುತ್ತಲೂ ಸುಂದರವನ.

ಒಮ್ಮೆ ಹಾಸ್ಯದಿ, ಒಮ್ಮೆ ಮೌನದಿ
ಸುಖ ದುಃಖಗಳ ಹಂಚಿಕೊಳ್ಳುತ್ತ
ಸಂತುಷ್ಟರಾದೆವು ನಾವಿಬ್ಬರೂ..
ಒಬ್ಬರನೊಬ್ಬರು ಸರಿಯಾಗಿ ಅರ್ಥೈಸಿಕೊಳ್ಳುತ್ತ.

ನೀನೆ ನನ್ನ ನಲ್ಮೆಯ ಗೆಳತಿ
ನನ್ನ ಜೀವನದ ಕೊನೆವರೆಗೂ
ಶಾಶ್ವತವಾಗಿರುವ ಒಲ್ಮೆಯ ಗೆಳತಿ.